వికారాబాద్ జిల్లా…
తాండూర్ తహసిల్దార్ బర్తరఫ్ చేయాలి
ఠాకూర్ సూరజ్ సింగ్ డిమాండ్
తాండూర్: తాండూర్ తహసీల్దార్ తారా సింగ్ను వెంటనే సస్పెండ్ చేసి, ఉద్యోగం నుంచి బర్తరఫ్ చేయడంతో పాటు ఆయనపై క్రిమినల్ చర్యలు చేపట్టాలని జనసత్తా వెల్ఫేర్ ఆర్గనైజేషన్ వికారాబాద్ జిల్లా అధ్యక్షులు ఠాకూర్ సూరజ్ సింగ్ డిమాండ్ చేశారు.
తాండూర్ మండలం చెంగోల్ గ్రామంలోని సర్వే నంబర్లు 200, 212, 141, 142, 143లో మొత్తం 11 ఎకరాల 8 గుంటల భూమికి సంబంధించి తప్పుడు పత్రాలు సృష్టించి, సంబంధం లేని వ్యక్తులను వారసులుగా ధ్రువీకరించి వారికి అనుకూలంగా తహసీల్దార్ వ్యవహరించారని సూరజ్ సింగ్ ఆరోపించారు.
ప్రభుత్వ ఉద్యోగిగా విధి నిర్వహణలో చట్ట నిబంధనలకు అనుగుణంగా వ్యవహరించాల్సిన తహసీల్దార్, అసలు యజమానికి నష్టం కలిగించే విధంగా వ్యవహరించారని ఆరోపించారు. ఈ విషయంపై వికారాబాద్ జిల్లా కలెక్టర్, సీసీఎల్ఏ కమిషనర్కు ఫిర్యాదు చేసి, తారా సింగ్ను విధుల నుంచి తప్పించాలని కోరినట్లు తెలిపారు.
తారా సింగ్ తాండూర్లో మూడేళ్లకు పైగా విధులు నిర్వహిస్తున్నారని, ఈ కాలంలో అవినీతి, అక్రమాలకు పాల్పడి అక్రమ లాభాలు పొందుతున్నారని సూరజ్ సింగ్ ఆరోపించారు. ప్రభుత్వ ఆస్తులను పరిరక్షించాల్సిన బాధ్యత కలిగిన అధికారి కోట్ల రూపాయల విలువైన ఆస్తులను ఇతరుల పాలు చేసేలా వ్యవహరించారని ఆరోపిస్తూ, ఆయనపై క్రిమినల్ కేసు నమోదు చేయాలని డిమాండ్ చేశారు.
ప్రభుత్వ భూములు, ఆస్తులను కాపాడాలని పలుమార్లు ఫిర్యాదు చేసినప్పటికీ తహసీల్దార్ పట్టించుకోలేదని, కబ్జాదారులకు అనుకూలంగా వ్యవహరిస్తున్నారని ఆరోపించారు. పై అధికారులకు ఫిర్యాదులు చేసినా చర్యలు తీసుకోకుండా నిర్లక్ష్యంగా వ్యవహరిస్తున్నారని విమర్శించారు.
తాండూర్లోని సర్వే నంబర్ 111, 130తో పాటు కస్టోడియన్ ప్రాపర్టీలు, ఇతర ప్రభుత్వ భూములు, ఆస్తుల విషయంలో అధికార దుర్వినియోగానికి పాల్పడ్డారని సూరజ్ సింగ్ ఆరోపించారు. ఈ అంశాలపై ఏసీబీకి ఫిర్యాదు చేసి, చట్టపరమైన చర్యలు తీసుకునేలా కృషి చేస్తానని ఆయన తెలిపారు.
అయితే, తహసీల్దార్పై చేసిన ఆరోపణలపై సంబంధిత అధికారి వివరణ వెలువడాల్సి ఉంది.
