వికారాబాద్ జిల్లా…
FMG ఇంటర్న్‌లకు సమాన స్టైపెండ్‌ ఇవ్వాలి
తెలంగాణలో విదేశీ వైద్య గ్రాడ్యుయేట్ల డిమాండ్‌
తాండూర్ లోని ప్రభుత్వ వైద్య కళాశాల కొడంగల్ ముందు ఫ్లెక్సీ ప్లకార్డులతో నిరసన
హైదరాబాద్‌: విదేశాల్లో MBBS పూర్తి చేసి, తప్పనిసరి FMGE లైసెన్సింగ్‌ పరీక్షలో ఉత్తీర్ణత సాధించిన విదేశీ వైద్య గ్రాడ్యుయేట్లు (FMG) ప్రస్తుతం తెలంగాణ ప్రభుత్వ ఆసుపత్రుల్లో CRMI ఇంటర్న్‌షిప్‌ చేస్తున్నారు. అయితే తమకు ఇతర ఇంటర్న్‌లతో సమానంగా స్టైపెండ్‌ చెల్లించడం లేదని వారు ఆవేదన వ్యక్తం చేస్తూ తాండూర్ లోని ప్రభుత్వ వైద్య కళాశాల కొడంగల్ ముందు ఫ్లెక్సీ, ప్లే కార్డ్ లతో నిరసన వ్యక్తం చేశారు
ప్రభుత్వ ఆసుపత్రుల్లో విధులు నిర్వహిస్తున్న FMG ఇంటర్న్‌లు OPD, వార్డులు, క్యాజువాలిటీ, ఎమర్జెన్సీ తదితర విభాగాల్లో ఇతర ఇంటర్న్‌లతో సమానంగా సేవలందిస్తున్నామని తెలిపారు. అందువల్ల తమకు కూడా సమానమైన స్టైపెండ్‌ చెల్లించాలని డిమాండ్‌ చేస్తున్నారు.
వర్తించే NMC మార్గదర్శకాలు, సంబంధిత సూచనల ప్రకారం IMG ఇంటర్న్‌లతో సమానంగా నెలకు రూ.29,792 స్టైపెండ్‌, అర్హత ఉన్న కాలానికి సంబంధించిన బకాయిలతో సహా చెల్లించాలని కోరుతున్నారు. అయితే రాష్ట్రంలోని పలువురు FMG ఇంటర్న్‌లకు స్టైపెండ్‌ చెల్లింపులు జరగడం లేదని, మరికొందరికి నెలకు కేవలం రూ.5,000 మాత్రమే అందుతోందని పేర్కొన్నారు.
ఈ సమస్యపై గత సెప్టెంబర్‌ 23న DME తెలంగాణకు వినతిపత్రంతో పాటు సంబంధిత ఆధారాలను సమర్పించినట్లు తెలిపారు. అయినప్పటికీ ఇప్పటివరకు సమస్యకు సంతృప్తికరమైన లిఖితపూర్వక పరిష్కారం లభించలేదని వెల్లడించారు.
దీంతో తమ సమస్యను అధికారుల దృష్టికి తీసుకెళ్లేందుకు అక్టోబర్‌ 8 నుంచి OP విధులను నిలిపివేసి శాంతియుత నిరసనకు దిగుతున్నట్లు FMG ఇంటర్న్‌లు ప్రకటించారు. సమస్య పరిష్కారం కాకపోతే అక్టోబర్‌ 14 నుంచి DME కార్యాలయం వద్ద శాంతియుత నిరసన చేపడతామని తెలిపారు.
DME, ఆరోగ్య శాఖ, తెలంగాణ ప్రభుత్వం ఈ అంశాన్ని అత్యవసరంగా పరిష్కరించి, FMG ఇంటర్న్‌లకు భారతీయ వైద్య విద్యార్థుల (ఇంటర్న్‌లతో )సమానంగా స్టైపెండ్‌ అమలు చేయాలని వారు విజ్ఞప్తి చేశారు.
“సమాన పని – సమాన స్టైపెండ్‌” అనే నినాదంతో తమ న్యాయమైన డిమాండ్‌ కోసం శాంతియుతంగా, నిబంధనలకు లోబడి పోరాటం కొనసాగిస్తామని FMG ఇంటర్న్‌లు స్పష్టం చేశారు.
